Qlobal maliyyə bazarlarının diqqətlə izlədiyi Bank of Japan (BoJ) növbəti tarixi qərarına imza atdı! Yaponiya Mərkəzi Bankı, inflyasiya təzyiqlərinin artması fonunda gözlənildiyi kimi uçot dərəcəsini 25 baza bəndi artıraraq 1%-ə çatdırdı. Bu addımla ölkədə faiz dərəcələri son 31 ilin (1995-ci ildən bəri) ən yüksək səviyyəsinə yüksəlmiş oldu. BoJ-un idarə heyəti tərəfindən 1-ə qarşı 7 səslə qəbul edilən bu strateji qərar, ölkədəki “yapışqan” inflyasiya və xüsusilə Yaxın Şərqdəki gərginlik səbəbindən artan xam neft qiymətlərinin istehlak bazarına mənfi təsirlərini cilovlamaq məqsədi daşıyır. Bank rəsmiləri bəyan ediblər ki, neft qiymətlərinin sürətlə ötürülməsi istehlak inflyasiyasını BoJ-un illik 2%-lik hədəfinin üzərinə çıxara bilər və buna görə də qabaqlayıcı sərtləşdirmə addımları qaçılmazdır.
Mərkəzi Bank faiz artımı ilə yanaşı, pul-kredit siyasətinin sərtləşdirilməsinin davamı olaraq istiqraz satınalma proqramını da ixtisar edəcəyini açıqlayıb. Plana əsasən, BoJ 2027-ci ilin mart ayına qədər hər rüb üzrə aylıq dövlət istiqrazı alışı həcmini təxminən 200 milyard yen azaldacaq və daha sonra bu həcmi aylıq 2 trilyon yen səviyyəsində sabit saxlayacaq. Qərardan sonra Yaponiya valyutası ciddi dalğalanma göstərməyərək ABŞ dolları qarşısında 160.21 səviyyələrində qərarlaşıb. BoJ rəhbərliyi, faiz artımına baxmayaraq iqtisadi aktivliyi dəstəkləməyə davam edəcəklərini və iqtisadi şəraitdən asılı olaraq gələcəkdə də faiz dərəcələrini artırmağa meyilli olduqlarını vurğulayıb.