Azərbaycanın fiskal və xarici ehtiyatları sabitliyini qoruyur.
BBN.az xəbər verir ki, bu barədə Avropa Yenidənqurma və İnkişaf Bankının (EBRD) sentyabr ayı üzrə açıqladığı “Regional iqtisadi perspektivlər” icmalında bildirilir.
Sənəddə qeyd olunur ki, 2025-ci ilin ilk yarısında dövlət büdcəsinin profisiti ÜDM-in 4,4 %-i həcmində olub. Strateji valyuta ehtiyatları isə (Dövlət Neft Fondunun aktivləri ilə birlikdə) iyunun sonuna 78,8 milyard ABŞ dollarına çatıb. Bu fonda “Moody’s” beynəlxalq reytinq agentliyi iyun ayında Azərbaycanın maliyyə sabitliyini vurğulayaraq ölkənin suveren reytinqini “Baa3” səviyyəsinə qaldırıb.
EBRD-nin açıqlamasına əsasən, 2024-cü ilin sonunda 2,2 % olan orta illik inflyasiya 2025-ci ilin avqustuna qədər ərzaq və xidmətlərin bahalaşması nəticəsində 5,6 %-ə yüksəlib.
Bununla yanaşı, inflyasiya 4 % (+2) hədəf diapazonunun yuxarı həddinə yaxın olsa da, Azərbaycan Mərkəzi Bankı 2025-ci ilin iyulunda uçot dərəcəsini 25 baza bəndi azaldaraq 7 %-ə endirib.
