ABŞ administrasiyasının oktyabrın 1-dən etibarən Avropadan idxal olunan dərman məhsullarına 100% gömrük rüsumları tətbiq etməsi Almaniya və ümumilikdə Avropa üçün ciddi çağırış yaradacaq. Bu qərar yalnız Avropa istehsalçılarının iqtisadi maraqlarına deyil, həm də qlobal səhiyyə sisteminin dayanıqlılığına təhlükə yaradır.
Almaniyanın Elmi-Tədqiqat Farmasevtika Şirkətləri Assosiasiyası (VFA) bildirib ki, bu tədbirlər beynəlxalq tədarük zəncirlərini pozaraq dərmanların qiymətinin artmasına və həyat üçün vacib preparatların əlçatanlığının məhdudlaşmasına səbəb ola bilər. Qərar Avropa istehsalçılarının dünya bazarında mövqeyini zəiflədə və investisiya fəaliyyətini dondura bilər.
Xüsusilə Almaniya üçün bu addım ağır nəticələr doğuracaq. Ölkədə təxminən 130 min nəfər farmasevtika sənayesində çalışır və 2024-cü ildə Almaniyanın ABŞ-a dərman ixracı 27 milyard avro təşkil edib ki, bu da Almaniyanın ümumi dərman ixracının təxminən dörddə birini əhatə edir.
ABŞ hökumətinin məqsədi daxili istehsalı artırmaq və dərman qiymətlərini aşağı salmaqdır. May ayında imzalanan fərmanla dərmanların qiymətinin 59-90% arasında azaldılması nəzərdə tutulur. Lakin bunun əsas yolu xarici istehsalçılara təzyiq göstərmək və istehsalın ABŞ-da lokallaşdırılmasını stimullaşdırmaqdır.
Bu gömrük rüsumları səbəbindən transnasyonal şirkətlərin istehsal güclərini ABŞ-a köçürməsi gözlənilir. Eyni zamanda, Avropanın, xüsusilə Almaniya və İsveçrənin, farmasevtika sənayesi zəifləyəcək və Avropa bazarının rəqabət qabiliyyəti azalacaq.
