Azərbaycan bank sektoru yaxın illərdə yaşıl maliyyələşmənin genişləndirilməsinə xüsusi diqqət yetirəcək.
BBN.az xəbər verir ki, bunu Azərbaycan Banklar Assosiasiyasının (ABA) prezidenti Zakir Nuriyev bildirib.
Onun sözlərinə görə, COP29 çərçivəsində bank sektoru qarşıdakı 5 il üçün 2 milyard manat həcmində yaşıl kredit öhdəliyi götürüb.
“Bu vəsait əsasən bərpa olunan enerji layihələrinə, xüsusilə günəş və külək enerjisinə, həmçinin sənaye və kommersiya sektorunda enerji səmərəliliyinin artırılmasına yönəldiləcək”, – deyə o qeyd edib.
ABA prezidentinin sözlərinə görə, yaşıl maliyyələşmə çərçivəsində enerji effektiv yaşayış və tikinti layihələri, aqrar sektorda iqlimə davamlı texnologiyalar və elektrik nəqliyyatının inkişafı da dəstəklənəcək.
Z.Nuriyev əlavə edib ki, banklar həm iri şirkətlərin, həm də kiçik və orta sahibkarlıq subyektlərinin ekoloji təmiz texnologiyalara keçidini fəal şəkildə maliyyələşdirəcək.
Onun sözlərinə görə, eyni zamanda fərdi müştərilər üçün də yaşıl maliyyə məhsulları genişləndirilir.
“Xüsusilə elektromobillərin alınması və yaşayış binalarının enerji effektivliyinin artırılması üçün güzəştli kreditlər təqdim edilir”, – deyə o bildirib.
