Azərbaycanda avtonəqliyyat vasitəsi sahiblərinin mülki məsuliyyətinin icbari sığortası üzrə sığorta haqqının hesablanması qaydasında dəyişiklik edilib.
BBN.az xəbər verir ki, yeni qaydaya əsasən, avtomobillər taksi fəaliyyəti üçün istifadə edildikdə icbari sığorta müqaviləsi bağlanarkən birillik sığorta haqqının hesablanması üçün 1,5 əmsalı tətbiq olunacaq.
Məsələ ilə bağlı iqtisadçı ekspert Xalid Kərimli bildirib ki, bu qərar əsaslandırılmış və düzgün addımdır. Onun sözlərinə görə, taksi xidmətlərində qiymətlər əsasən bazardakı rəqabət, sifarişlərin həcmi və taksilərin sayı ilə formalaşır və sığorta əmsalının artırılması qiymətlərə ciddi təsir göstərməyəcək.
Ekspert qeyd edib ki, taksi kimi istifadə olunan avtomobillərin risk səviyyəsi daha yüksəkdir və buna görə də sığorta haqqının daha yüksək olması məntiqlidir.
Sığorta eksperti Nicat Əlibəyli isə bildirib ki, bu dəyişiklik daha çox sığorta şirkətlərinin maliyyə dayanıqlığının qorunmasına xidmət edir. Onun sözlərinə görə, taksi kimi istifadə olunan avtomobillər daha tez köhnəlir və qəza riski daha yüksək olur.
Ekspert əlavə edib ki, artan risklər səbəbindən sığorta şirkətləri daha çox ödəniş etməli olur və yeni əmsallar bu yükün balanslaşdırılmasına kömək edəcək.
Qeyd olunub ki, dəyişikliklərə baxmayaraq, taksi xidmətlərində ciddi qiymət artımı gözlənilmir.
