Qlobal inflyasiya təzyiqləri və Yaxın Şərqdəki geosiyasi gərginliklər fonunda pul-kredit siyasətini sərtləşdirən Avstraliya Mərkəzi Bankı faiz dərəcələrini artırdıqdan sonra növbəti addımlar üçün gözləmə mövqeyinə keçib. Qurum regional münaqişənin ölkə iqtisadiyyatına göstərəcəyi təsirləri daha yaxından izləmək üçün zamana ehtiyac olduğunu bəyan edib.
BBN.az xəbər verir ki, Avstraliya Ehtiyat Bankının (RBA) may ayı iclasının bu gün dərc olunmuş protokolları (minutes) mərkəzi bankın faiz dərəcələrini artırdıqdan sonra daxili bazarda müəyyən bir “manevr sahəsi” qazandığını göstərir. İnflyasiya risklərinin artmasına baxmayaraq, tənzimləyici qurum İran böhranının qlobal tədarük zəncirinə təsirlərini tam analiz etmək üçün siyasəti müvəqqəti sabit saxlamağa işarə vurub.
Rəsmi sənədlərə əsasən, Pul-Kredit Siyasəti Şurasının 9 üzvündən 8-i inflyasiyanı cilovlamaq üçün uçot dərəcəsinin 25 baza bəndi artırılaraq 4.35%-ə çatdırılmasının lehinə səs verib. RBA rəsmiləri bəyan ediblər ki, bu il ardıcıl həyata keçirilən üç faiz artımından sonra maliyyə şərtləri artıq məhdudlaşdırıcı (restrictive) səviyyəyə çatıb və bu, mərkəzi banka Yaxın Şərqdəki hadisələrin neft qiymətlərinə və iqtisadi artıma təsirini müşahidə etmək üçün kifayət qədər vaxt qazandırır.
Analitiklər qeyd edirlər ki, mərkəzi bankın baza proqnozları Hürmüz boğazının yaxın vaxtlarda açılacağı ssenarisinə əsaslansa da, bu ehtimal hələ ki, uzaq görünür və Brent neftinin bir barreli 110 dollar ətrafında dəyişir. Bununla belə, ABŞ Prezidenti Donald Trampın İrana qarşı planlaşdırılan hərbi əməliyyatı danışıqlara şans vermək üçün təxirə salması RBA-nın inflyasiya gözləntilərini qismən rahatladır və maliyyə bazarlarında növbəti faiz artımının avqust ayına qədər təxirə salınacağı ehtimalını gücləndirir.
