Azərbaycanda dövlət müəssisələrinin yaradılması və onların fəaliyyəti üzərində rəqabət baxımından nəzarətin gücləndirilməsi ilə bağlı yeni addımlar planlaşdırılır.
BBN.az xəbər verir ki, bu istiqamətdə nəzərdə tutulan tədbirlər Dünya Bankı Qrupunun “Business Ready” hesabatının “Bazar rəqabəti” indikatoru üzrə 2026-cı il üçün hazırlanmış Yol Xəritəsində əks olunub.
Sənədə əsasən, dövlət müəssisələrinin təşkili və bazarda təmərküzləşmələrə nəzarətlə bağlı mövcud qiymətləndirmə mexanizmlərinin işləmə praktikası və boşluqları diaqnostik təhlildən keçiriləcək.
Gələcəkdə dövlət müəssisələrinin yaradılması rəqabət orqanı tərəfindən qiymətləndiriləcək. Bu prosesdə həmin qurumların bazarda sağlam rəqabəti pozub-pozmadığı və ya rəqabət baxımından neytral olub-olmadığı araşdırılacaq.
Eyni zamanda, qanunvericilikdə dəyişikliklərlə bağlı təkmilləşdirilmiş təkliflərin hazırlanaraq aidiyyəti orqanlara təqdim edilməsi də nəzərdə tutulur. Bu tədbirlərin 1 sentyabr 2026-cı ilədək icra olunması planlaşdırılır.
Bundan əlavə, dövlət müəssisələri yaradılarkən və fəaliyyətləri boyunca rəqabəti məhdudlaşdıra biləcək təsirlərin qarşısını almaq üçün müvafiq yoxlamalar aparılacaq.
Bu tədbirlərin icrasını Prezident yanında Antiinhisar və İstehlak Bazarına Nəzarət Dövlət Agentliyi ilə Ədliyyə Nazirliyi təmin edəcək.
