Britaniya şirkətləri Azərbaycanda məlumatların emalı mərkəzləri sahəsində layihələrin həyata keçirilməsi imkanlarını araşdırır və bu istiqamətdə Azərbaycan hökuməti, eləcə də yerli tərəfdaşlarla danışıqlar aparır.
BBN.az xəbər verir ki, bunu Böyük Britaniyanın Azərbaycana yeni təyin olunmuş səfiri Dankan Norman mətbuat konfransında bildirib.
Səfir qeyd edib ki, Böyük Britaniya süni intellekt və qabaqcıl texnologiyalar sahəsində aparıcı ölkələrdən biridir və bu istiqamət Azərbaycanla əməkdaşlıqda xüsusi yer tutur.
Onun sözlərinə görə, məlumatların emalı mərkəzlərinin fəaliyyəti böyük həcmdə enerji tələb etdiyindən, bu sahə iki ölkə arasında əməkdaşlığın genişləndirilməsi üçün yeni imkanlar yarada bilər.
Dankan Norman bildirib ki, Britaniya şirkətləri hazırda Azərbaycanda potensial tərəfdaşlarla fəal müzakirələr aparırlar. Lakin mümkün layihələrin konkret detalları hələ açıqlanmır.
Səfir gələcəkdə bu danışıqların nəticəsi olaraq maraqlı layihələrin gündəmə gələ biləcəyinə ümid etdiyini vurğulayıb.
