Hindistan kriptovalyutaların alış satışını qeyri-qanuni edəcək

Dünya ölkələrinin rəqəmsallaşmaya doğru illərdir sürətlə irəliləməsinə baxmayaraq, kriptovalyutalar hələ də bir çox istehlakçılara qaranlıq qalmaqdadır. Kriptovalyutalar Çin, Cənubi Koreya, Yaponiya kimi bir sıra Asiya ölkələrində böyük rəğbətlə qarşılansa da, Hindistanda artıq fəaliyyətini dayandıra bilər. Belə ki, Narendra Modi rəhbərliyi altında iqtidarda olan hökumət yeni qanun layihəsi irəli sürüb.

 “The Cryptocurrency and Regulation of Official Digital Currency Bill, 2021” adlanan bu qanun layihəsi çərçivəsində dünyanın altıncı ən böyük iqtisadiyyatına malik Hindistanda kriptovalyutalardan istifadə qadağan ediləcək. Bunun əsas səbəbi olaraq isə, ölkənin yaxın vaxtlarda pilot test rejimində olan Mərkəzi Bank Rəqəmsal Valyutasını (CBDC) istifadəyə verməyi planlaşdırması ehtimal edilir. Belə ki, bu yolla 2022-ci ildə istifadəyə verilməsi planlaşdırılan CBDC böyük rəqabətlə üzləşməyəcək.

Məlumat üçün qeyd edək ki, hazırda kriptovalyutalara ən çox maraq göstərən ölkə El Salvadordur. Latın Amerikasında yerləşən ölkə sentyabr ayında “bitcoin” kriptovalyutasını ölkədə rəsmi ödəniş vasitəsi kimi qəbul etməklə yanaşı, milyardlarla dollar xərci olan “Bitcoin City” şəhərinin inşasını planlaşdırıb.

© Materiallardan istifadə edərkən hiperlinklə istinad olunmalıdır