“Meta” şirkəti süni intellekt departamentində aparılan yenidənqurma çərçivəsində təxminən 600 əməkdaşını işdən çıxarır.
BBN.az xəbər verir ki, şirkətin süni intellekt üzrə rəhbəri Aleksandr Vanq işçilərinə göndərdiyi məktubda bu qərarın “super intellekt laboratoriyası” daxilində aparılan struktur dəyişikliklərlə bağlı olduğunu bildirib.
“Meta” son aylarda “OpenAI”, “Anthropic” və “Google” kimi şirkətlərlə rəqabətdə süni intellekt sahəsində fəallığını artırmış, milyonlarla dollarlıq maaş təklifləri ilə rəqib şirkətlərdən 50-dən çox tədqiqatçını öz heyətinə cəlb etmişdi. Lakin “OpenAI”ın baş direktoru Sem Altman bildirib ki, onların ən yaxşı mütəxəssisləri bu təklifləri qəbul etməyiblər.
Aleksandr Vanq məktubunda qeyd edib:“Komandamızın ölçüsünü kiçildərək qərarların qəbulunu daha çevik edəcəyik. Hər bir əməkdaş daha çox məsuliyyət daşıyacaq, daha geniş səlahiyyət və təsir imkanına malik olacaq.”
Məlumata görə, “Meta”nın ümumi işçi sayı əhəmiyyətli dərəcədə azalmayacaq. Şirkət bildirir ki, işdən azad edilənlərin əksəriyyəti “Meta” daxilində digər şöbələrdə yeni vəzifələrdə çalışma imkanı qazana biləcək.
