Nvidia şirkətinin baş icraçı direktoru Jensen Huang OpenAI-yə planlaşdırılan iri həcmli investisiyanın hələ də qüvvədə olduğunu bildirib və bu mövzuda yayılan narahatlıqları təkzib edib.
Huang şənbə günü Taypeydə jurnalistlərə açıqlamasında OpenAI-dən narazı olması ilə bağlı iddiaları “tamamilə əsassız” adlandırıb. Reuters və Bloomberg-in məlumatına görə, Nvidia rəhbəri OpenAI-ni dövrümüzün ən təsirli şirkətlərindən biri kimi dəyərləndirib.
“Biz OpenAI-yə çox böyük investisiya edəcəyik. Onların gördüyü işlər inanılmazdır və mən OpenAI-yə tam inanıram,” – deyə Jensen Huang bildirib.
100 milyard dollarlıq plan hələ gündəmdədir
Nvidia ötən ilin sentyabrında OpenAI-yə 100 milyard dollara qədər investisiya yatırmağı planlaşdırdığını açıqlamışdı. Sözügedən razılaşma OpenAI-yə həm maliyyə vəsaiti, həm də Nvidia-nın qabaqcıl çiplərinə çıxış imkanı verəcəkdi.
Lakin The Wall Street Journal ötən cümə günü bu planın ləngidiyini və razılaşmanın hələ yekunlaşmadığını iddia etmişdi. Qəzetin yazdığına görə, Huang razılaşmanın qeyri-məcburi olduğunu və OpenAI-nin biznes yanaşmasında intizamla bağlı müəyyən narahatlıqlarını özəl söhbətlərdə dilə gətirib.
Huang iddiaları təkzib etdi
Bu iddialara cavab olaraq Jensen Huang Nvidia-nın OpenAI-nin hazırkı investisiya mərhələsində iştirak edəcəyini açıq şəkildə təsdiqləyib:
“Sam Altman investisiya mərhələsini yekunlaşdırır və biz mütləq iştirak edəcəyik. Bu, ehtimal ki, indiyə qədər etdiyimiz ən böyük investisiya olacaq.”
Huang investisiyanın 100 milyard dolları keçməyəcəyini də vurğulayıb və yekun məbləğin açıqlanmasını OpenAI rəhbəri Sam Altmanın öhdəsinə buraxıb.
AI sektorunda strateji tərəfdaşlıq
Bu açıqlama süni intellekt sektorunda Nvidia–OpenAI tərəfdaşlığının davam etdiyini və bazarlarda yayılan qeyri-müəyyənliklərin əsasən şayiələrdən qaynaqlandığını göstərir. Nvidia üçün OpenAI, yüksək performanslı çiplərə artan tələbin əsas hərəkətverici qüvvələrindən biri olaraq qalır.
