Qazaxıstan faiz artımına gedib

Qazaxıstan Milli Bankı xarici sektor tərəfindən risklərin mənfi təsiri fonunda qiymətlərin sabitliyinin qorunması məqsədilə uçot dərəcəsinin səviyyəsinə dair növbədənkənar qərar qəbul edib.

Mart ayının 10-dan etibarən uçot dərəcəsi 2,75 baza bəndi artırılaraq 12 faiz (daha əvvəl 9,25 faiz idi) səviyyəsində müəyyən olunub. Faiz dəhlizinin yuxarı və aşağı hədləri uçot dərəcəsinə ±1,5 faizlik diapazonda müəyyənləşdirilib (13,5 faiz və 10,5 faiz).

Uçot dərəcəsinin artırılması haqqında qərar dünya iqtisadiyyatında vəziyyətin kəskin dəyişməsinə cavab olaraq qəbul edilib. “Covid-19” virusunun yayılma coğrafiyasının əhəmiyyətli dərəcədə genişlənməsi, Qazaxıstan məhsullarının əsas istehlakçıları olan ölkələrin iqtisadi inkişaf perspektivlərinin zəifləməsi qərarın qəbul edilməsi üçün əsas amillər olub.

Qeyd edək ki, Milli Bankın uçot dərəcəsi üzrə qərarının martın 16-da elan olunması nəzərdə tutulurdu.

Xatırladaq ki, martın 9-da dünya birjalarında neftin qiymətinin ucuzlaşması fonunda Nur-Sultan (keçmiş Astana) və Almatıdakı valyuta mübadilə məntəqələrində ABŞ dolların məzənnəsi kəskin şəkildə yüksəlib.

Mənbə:Azərtac