Qızılın qiyməti çərşənbə günü bir unsiya üçün 4 min dollar həddini aşaraq tarixi rekorda yüksəldikdən sonra, investorların mənfəət realizasiyası (satışları) səbəbindən enməyə başlayıb.
BBN.az xəbər verir ki, spot qızılın qiyməti çərşənbə günü 4059,31 dollara çatdıqdan sonra bu gün səhər saatlarında 0,3% azalaraq 4031,21 dollara qədər geriləyib.
Son günlərdəki sürətli bahalaşmadan sonra qızıl bazarında korreksiya (müvəqqəti düzəliş) mərhələsi müşahidə olunur. Əvvəlki sessiyada 1,4% bahalaşan qiymət, cümə axşamı 1%-ə yaxın ucuzlaşıb. Texniki göstəricilər son bir ayda qızılın “həddindən artıq alış” zonasına daxil olduğunu göstərir ki, bu da bir çox investorun mənfəət realizasiyasına getməsinə səbəb olub.
Xatırladaq ki, bu il qızılın dəyəri qlobal ticarət, ABŞ Federal Ehtiyat Sisteminin (FED) müstəqilliyi və ABŞ maliyyə sabitliyi ilə bağlı qeyri-müəyyənliklər fonunda 50%-dən çox artıb. Eyni zamanda, artan geosiyasi gərginliklər təhlükəsiz aktivlərə marağı gücləndirir, mərkəzi banklar isə qızıl ehtiyatlarını artırmağa davam edirlər.
