Rəqəmsal ödənişlər sahəsində fırıldaqçılıqla mübarizə mövzusunda tədbir keçirilib

35

16 may 2025-ci il tarixində Azərbaycan Banklar Assosiasiyası (ABA) və “MasterCard Worldwide” beynəlxalq ödəniş sistemi tərəfindən rəqəmsal ödənişlər sahəsində fırıldaqçılıqla mübarizəyə dair bilik və bacarıqların artırılması məqsədilə tədbir keçirilmişdir.

ABA-nın nəzdində fəaliyyət göstərən “Rəqəmsal ödənişlər sahəsində fırıldaqçılıq əməliyyatlarına qarşı mübarizə üzrə Ekspert Qrupu” üzvlərinin də iştirak ilə baş tutan tədbir çərçivəsində fırıldaqçılıq əməliyyatlarının növləri, bu risklərin idarəedilməsi və qabaqcıl beynəlxalq təcrübə, fırıldaqçılıq əməliyyatları sahəsində müşahidə edilən son trendlər müzakirə olunmuşdur.

Bu təşəbbüs çərçivəsində bank sektorunun müvafiq əməkdaşlarının biliklərinin təkmilləşdirilməsi, eyni zamanda sektor daxilində əlaqələndirilmiş mübarizə imkanlarının artırılması hədəflənir.

Qeyd edək ki, Azərbaycan Banklar Assosiasiyası (ABA) 1990-cı ildə kommersiya bankları tərəfindən təsis edilib. ABA-nın əsas məqsədi üzv-təşkilatların maraqlarını qorumaq, onların müxtəlif növ işgüzar xidmətlərə olan ehtiyaclarının ödənilməsinə dəstək göstərmək və fəaliyyətlərini əlaqələndirməkdən ibarətdir. Hazırda, 22 bank və 2 qeyri-bank kredit təşkilatı, 3 digər təşkilat olmaqla, ümumilikdə 27 təşkilat ABA-nın üzvüdür.