TDAM rəhbəri türk dövlətlərinin yay məktəbində çıxış edib

İqtisadi İslahatların Təhlili və Kommunikasiya Mərkəzinin (İİTKM) nəzdində fəaliyyət göstərən Türk Dünyası Araşdırmalar Mərkəzinin (TDAM) rəhbəri Vüsalə Cəfərova Türkiyənin İstanbul şəhərində keçirilən “Türk dünyası üçün yeni dövr” beynəlxalq yay məktəbində mühazirə oxuyub.

“Qitələri birləşdirən Azərbaycanın Türk Dünyasının iqtisadi inteqrasiyasında rolu” mövzusunda təqdimatında V.Cəfərova Azərbaycanın Avropanın etibarlı enerji təchizatçısı kimi regional neft və qaz boru kəmərlərinin tikilməsində təşəbbüskarlığı və həyata keçirdiyi investisiya layihələrinin Xəzər Dənizi hövzəsinin və Türk dünyasının beynəlxalq bazarlara çıxışının təmin edilməsində rolu barədə türk dünyasından olan tədqiqatçılara geniş məlumat verib. TDAM rəhbəri Bakı Beynəlxalq Dəniz Ticarət Limanı  və Bakı-Tbilisi-Qars dəmir yolunun Orta Dəhliz üçün əhəmiyyəti, Azərbaycanın Şərq-Qərb və Şimal-Cənub nəqliyyat şəbəkəsinin kəsişməsində yerləşən ölkə kimi bu sahəyə qoyduğu investisiyalar, eləcə də Zəngəzur dəhlizinin bərpa edilməsi istiqamətində görülən işləri auditoriyanın diqqətinə çatdırılıb.

Tədbir çərçivəsində Vüsalə Cəfərova Türkiyə, Qazaxıstan, Özbəkistan, Qırğızıstan, Macarıstanın beyin mərkəzlərinin nümayəndələri ilə görüşlər keçirib və onlara İİTKM-in hazırladığı dövri “Türk İqtisadi İcmalı” və “Türk dövlətləri iqtisadiyyatı” kitabını təqdim edib.