“Tesla” səhmləri rekord səviyyəyə qalxıb

Nəhəng elektrikli avtomobil istehsalçısı “Tesla” şirkətinin səhm dəyəri bazar ertəsi günü (13 yanvar) 10% artaraq 524.86 ABŞ dollarına çatıb və bununla da tarixində ilk dəfə 500 ABŞ dollarını keçib. “FactSet” maliyyə araşdırmaları şirkətinin məlumatına görə, səhmlərin qiyməti son üç ay ərzində iki qatına çıxıb. Bunun əsas səbəbləri kimi isə, “Tesla”nın Çin bazarına daxil olması və şirkətin dördüncü rüb göstəricilərinin “Wall Street” proqnozlarını üstələməsi göstərilir.

Səhm dəyərində qeydə alınan son artımlar nəticəsində “Tesla”nın bazar kapitalizasiyası 94.6 milyard ABŞ dollarına çatıb. Bu isə amerikan avtomobil bazarında ən yaxın rəqibləri olan “General Motors” və “Ford” şirkətlərinin bazar kapitalizasiyalarının cəmindən (86.74 milyard dollar) belə çoxdur.

Qeyd edək ki, “Tesla” şirkəti 2019-cu ilin sonunda Çinin Şanxay şəhəridə həftəlik maksimal 1000 elektromobil istehsal tutumuna malik zavodunda “Model 3 sedan” istehsalına başlayıb.

© Materiallardan istifadə edərkən hiperlinklə istinad olunmalıdır