Yaponiya Mərkəzi Bankı (BOJ) siyasət faizini 0,5 % səviyyəsində dəyişməz saxlayıb. Eyni zamanda Bank portfelindəki bəzi aktivlərin, xüsusən də birjada ticarət olunan fondların (ETF) satışına başlayacağını açıqlayıb.
BBN.az xəbər verir ki, qərar bazar gözləntilərinə uyğun olub. Səsvermə zamanı iki idarə heyəti üzvü qərara qarşı çıxıb ki, bu da BOJ sədri Kazuo Ueda üçün ilk dəfədir ki, iki müxalif səslə üzləşir.
Planlara əsasən, BOJ hər il 620 milyard yen (təxminən 4 milyard ABŞ dolları) dəyərində ETF satışı həyata keçirəcək. Hazırda Bankın balansında bu tip aktivlərin ümumi həcmi 251 milyard dollar təşkil edir.
ETF-lər (Exchange Traded Fund) investorların vəsaitini bir fonda toplayaraq müxtəlif maliyyə alətlərinə yönəldən və birjada səhm kimi alınıb-satılan investisiya vasitələridir. Onların əsas üstünlükləri aşağı xərclər, yüksək likvidlik və riskin diversifikasiyası imkanıdır.
