Bu gün “Bakı Fond Birjası” QSC-də (BFB) “Ziraat Bank Azərbaycan” ASC-nin 30 milyon manatlıq istiqrazlarının ilk tranşının yerləşdirilməsi üzrə növbəti hərrac keçirilib.
Hərracda 15 milyon manatlıq faizli, təmin edilməmiş, sənədsiz, adlı istiqrazlar yerləşdirilib.
Məlumata görə, hər birinin nominal dəyəri 100 manat olan 150 min ədəd istiqraz kütləvi təklif üsulu ilə investorlara təqdim edilib. İstiqrazlara 125 investor tərəfindən ümumi məbləği 60 milyon 656,5 min manat olan 144 sifariş daxil olub.
Nəticədə istiqrazların yerləşdirilməsi tam həcmdə baş tutub.
Qiymətli kağızların tədavül müddəti 1 il, illik gəlirliliyi isə 10,5% təşkil edir. İstiqrazlar üzrə faiz ödənişləri rüblük həyata keçiriləcək.
Yerləşdirmənin anderrayteri “PAŞA Kapital İnvestisiya Şirkəti” QSC-dir.
Emitentin istiqrazları tədavül müddəti ərzində geri alması nəzərdə tutulmayıb.
