Niderlandın ən böyük bank qrupu olan ING Group Azərbaycanda 2026-cı ildə orta illik inflyasiyanın 5,3%, 2027-ci ildə isə 8,9% səviyyəsində olacağını proqnozlaşdırır. Bankın əvvəlki proqnozu ilə müqayisədə 2026-cı il üçün gözləntilər 0,4 faiz bəndi azalıb, 2027-ci il üçün isə dəyişməz qalıb.
ING-nin məlumatına əsasən, 2025-ci ildə ölkədə inflyasiya 5,6% təşkil edib. Bank analitikləri 2026-cı ilin müxtəlif rüblərində inflyasiyanın orta illik səviyyəsini aşağıdakı kimi proqnozlaşdırırlar: I rüb – 5,2%, II rüb – 5,4%, III rüb – 5,3%, IV rüb – 5,5%.
Digər qurumların proqnozları isə belədir:
-
İqtisadiyyat Nazirliyi: 2025-ci ildə inflyasiya 5,4%, 2026-cı ildə 4,8%, 2027-ci ildə 4,5% olacaq.
-
Azərbaycan Mərkəzi Bankı (2025-ci ilin oktyabr proqnozu): 2025-ci ildə illik inflyasiya 6%, 2026-cı ildə 5,7%.
-
BMT: 2024-cü ildə inflyasiya 3,6%, 2025-ci ildə 3,1%.
-
Dünya Bankı: 2025-2026-cı illərdə orta illik inflyasiyanın 2,3% olacağını gözləyir.
-
Asiya İnkişaf Bankı: 2025-ci ildə 4,2%, 2026-cı ildə 3,5%.
-
“Moody’s” beynəlxalq reytinq agentliyi: 2024-cü və 2025-ci illərdə müvafiq olaraq 4% və 3%.
-
“Fitch Ratings”: 2025-ci ildə 5,3%, 2026-cı ildə 4,6%.
-
“Fitch Solutions”: 2025-ci ildə 5,7%, 2026-cı ildə 5,5%, 2027-ci ildə 4,8%.
Xatırladaq ki, 2024-cü ildə Azərbaycanda orta illik inflyasiya 2,2%, 2025-ci ilin yanvar-noyabr aylarında isə 5,7% olub.
