ABŞ prezidenti Donald Tramp noyabr ayında keçiriləcək aralıq (midterm) seçkiləri ərəfəsində seçicilərlə birbaşa ünsiyyəti artırmaq məqsədilə ölkə üzrə həftəlik səfərlərə başlamağı planlaşdırır. Bu barədə Ağ Evin aparat rəhbəri Syusi Uayls məlumat verib.
Onun sözlərinə görə, səfərlər çərçivəsində Tramp çərşənbə axşamı Ayova ştatında çıxış edəcək. Çıxışın əsas mövzuları iqtisadiyyat və enerji siyasəti olacaq. Eyni zamanda, kabinet üzvlərinin də yaxın aylarda ABŞ daxilində səfərlərini artıracağı bildirilib.
Reuters-in məlumatına görə, Tramp administrasiyası daxilində prezidentin diqqətinin əsasən xarici siyasət mövzularına yönəlməsi bəzi köməkçilər və qanunvericilər arasında narazılıq yaradıb. Rəy sorğuları isə Trampın iqtisadiyyatı idarə etməsi ilə bağlı ictimai dəstəyin zəif olduğunu göstərir.
Bir sıra iqtisadçılar prezidentin son iqtisadi təşəbbüslərinə şübhə ilə yanaşırlar. Bu səbəbdən, analitiklər Trampın regionlara səfərlərini iqtisadi gündəmi ön plana çıxarmaq və seçicilərin narahatlıqlarına cavab vermək cəhdi kimi qiymətləndirirlər.
Qeyd edək ki, Tramp bu açıqlamaları Davosda keçirilən Dünya İqtisadi Forumu çərçivəsində verib.
