ABŞ Enerji İnformasiya İdarəsi ötən həftənin statistikasını özündə cəmləşdirən həftəlik hesabat yayınlayıb. Hesabata görə, ölkədəki xam neft ehtiyatları həftə ərzində 3.1 milyon barel azalıb. Proqnozlar isə ehtiyatların 3.23 milyon barel azalması yönündə idi. Qeyd edək ki, bir öncəki həftə xam neft ehtiyatları 3.7 milyon barel geriləyib. Benzin ehtiyatları isə 319 min barel artaraq 237.3 milyon barelə çatıb. Gündəlik xam neft idxalı 277 min barel azalmaqla 6.2 milyon barel olub.
Hesabatın açıqlanmasından sonra neft qiymətlərində artım qeydə alınıb. Brent markalı xam neftin barel qiyməti 2.46 dollar (3.2%) artaraq 78.6 dollar səviyyəsində qərarlaşıb. West Texas Intermediate (WTI) xam nefti isə 1.78 dollar (2.4%) dəyər qazanaraq 75.57 dollar səviyyəsinə qalxıb.