Asiya birjaları çərşənbə axşamı ticarətində geriləmə ilə açılıb. Bazarlar ABŞ hökumətinin bağlanması səbəbindən gecikmiş iqtisadi göstəriciləri gözləyərkən, investorlar Federal Rezervin dekabrda faiz endirimi ehtimalını aşağı salırlar.
BBN.az xəbər verir ki, Reuters-in məlumatına görə, investorlar xüsusilə Noyabrın 20-də açıqlanacaq sentyabr ayına aid qeyri-kənd təsərrüfatı məşğulluq (NFP) hesabatını diqqətlə izləyirlər. Bu məlumatlar dünyanın ən böyük iqtisadiyyatının vəziyyətinə dair mühüm siqnallar verəcək.
Eyni zamanda, Yaponiyada diqqət mərkəzi Baş nazir Sanae Takaichi ilə Yaponiya Bankının rəhbəri Kazuo Ueda arasında bu gün keçiriləcək görüşdür. Bu görüş, ölkənin faiz siyasəti ilə bağlı mümkün dəyişikliklər barədə bazarların gözləntilərini artırıb.
Faiz endirimi ehtimallarının azalması və ABŞ iqtisadi perspektivlərinə dair qeyri-müəyyənlik fonunda Asiya indeksləri günə mənfi başlanğıc edib.
