Azərbaycan sığorta bazarının qarşısında duran əsas çağırışlar kibertəhlükəsizlik, qanunvericiliyin çevikliyi və rəqəmsal savadlılıqdır. Bunu “Azərbaycan Sığortaçılar Assosiasiyası” İctimai Birliyinin Müşahidə Şurasının və Türk Dünyası Sığorta Birliyinin sədri Ülviyyə Cabbarova Bakıda keçirilən “Türk Dövlətləri InsurTech Sammiti 2025”də bildirib.
Onun sözlərinə görə, rəqəmsallaşma yalnız texnologiyaların tətbiqi deyil, həm də sığorta ekosisteminin transformasiyası deməkdir:
“Süni intellekt, maşın öyrənməsi və böyük verilənlər artıq dəstək vasitəsi deyil, strateji dəyər yaradan əsas faktor kimi çıxış edir. Bu texnologiyalar əməliyyatların optimallaşdırılmasına, xərclərin azalmasına, müştəri təcrübəsinin fərdiləşdirilməsinə və qərarların sürətlə qəbul edilməsinə imkan yaradır.”
Ü. Cabbarova əlavə edib ki, Türk dünyasının sığorta sənayesi yeni inkişaf mərhələsinə qədəm qoyub:
“InsurTech çərçivəsində qarşılıqlı əməkdaşlıq, birgə layihələr və bilik mübadiləsi bazarların böyüməsinə, yeni məhsul modellərinin yaranmasına və kapitalın daha səmərəli idarə olunmasına mühüm təsir göstərəcək.”
