Azərbaycanda vaxtı keçmiş kreditlərin məbləği açıqlanıb

2023-cü ilin iyulun 1-ə Azərbaycanda vaxtı keçmiş kreditlərin məbləği 502.3 milyon manat təşkil edib. 

BBN.az Azərbaycan Mərkəzi Bankına (AMB)-nin iyun ayını əhatə edən hesabatına istinadən xəbər verir ki, bir ayda dəyişim 2.5% olub. Ölkədə problemli kreditlərin məbləği ilin əvvəlinə nisbətən 15,4%, son 1 ildə isə 24% azalıb.

Bu il iyunun sonuna vaxtı keçmiş kreditlərin ümumi kredit portfelində xüsusi çəkisi 2,3% təşkil edib. Bu nisbət mayın sonuna 2,3%, ötən ilin sonuna 2,9%, ötən il iyunun sonuna isə 3,5% olub.