Böyük Britaniyada illik inflyasiya son 16 ayın ən aşağı səviyyəsinə düşüb.
BBN.az xəbər verir ki, Böyük Britaniya Milli Statistika İdarəsinin (ONS) məlumatına görə, istehlak qiymətləri indeksi (İQİ) iyun ayında illik ifadədə 2,6% artıb.
Bu göstərici may ayında qeydə alınan 2,8%-lik inflyasiya səviyyəsindən aşağı olmaqla yanaşı, iqtisadçıların 2,7%-lik orta proqnozunu da üstələməyib.
İnflyasiyanın azalmasında əsas amillərdən biri xam neftin qiymətinin ucuzlaşması fonunda benzin və dizel yanacağının qiymətlərinin aşağı düşməsi olub.
Qiymət artımını zəiflədən digər amillər arasında qida və alkoqolsuz içkilərin qiymətlərindəki dəyişikliklər də yer alıb.
Bununla yanaşı, İngiltərə Bankının daxili tələb təzyiqlərini qiymətləndirmək üçün izlədiyi xidmət inflyasiyası 3,7%-dən 3,6%-ə enib. Göstərici gözləntilərdən bir qədər yüksək səviyyədə qalıb.
Rəsmi həftəlik məlumatlara əsasən, benzinin bir litrinin orta qiyməti may ayının sonundakı pik göstərici ilə müqayisədə 4% azalaraq təxminən 152 pens təşkil edib.
