Beynəlxalq Valyuta Fondu (BVF) ABŞ hökumətinin borc səviyyəsinin ilk dəfə həm İtaliya, həm də Yunanıstanı keçəcəyini proqnozlaşdırıb. Qurum bu vəziyyətin ABŞ dövlət maliyyəsinin getdikcə daha da gərginləşdiyini göstərdiyini bildirir.
BBN.az xəbər verir ki, BVF-nin son hesablamalarına əsasən, ABŞ-da ümumi dövlət borcu yaxın illərdə 20 faiz bəndi artaraq onilliyin sonunda ÜDM-in 143,4 faizinə çatacaq. Bu göstərici pandemiyadan sonrakı dövrün ən yüksək səviyyəsi olacaq.
BVF həmçinin qeyd edir ki, ABŞ-da büdcə kəsiri 2030-cu ilə qədər hər il ÜDM-in 7 faizindən yuxarı qalacaq. Bu isə fonun izlədiyi inkişaf etmiş ölkələr arasında ən yüksək nisbət sayılır.
İtaliya və Yunanıstan illərdir zəif fiskal dayanıqlılığa malik ölkələr kimi tanınırdı. Xüsusilə 2010–2012-ci illərdə baş verən Avrozonanın suveren borc böhranı zamanı hər iki dövlət BVF və Avropa İttifaqının nəzarəti altında xilasetmə proqramlarından keçmişdi.
Lakin hazırda bu iki ölkə büdcə siyasətinə ciddi nəzarət tətbiq etdiyindən, BVF onların borc yükünün onilliyin sonuna qədər azalacağını gözləyir.
Bunun əksinə olaraq, BVF-nin bu ay açıqladığı yeni məlumatlar göstərir ki, ABŞ-ın borcunun ÜDM-ə nisbəti artmaqda davam edəcək və 2030-cu ildə də yüksələn xətt üzrə qalacaq.
