Dərman testlərindən sonra “Fujifilm” səhmləri bahalaşıb

Çərşənbə günü Çin rəsmiləri tərəfindən aparılan yapon istehsalı “Avigan” preparatının testləri müsbət nəticə verib. 2014-cü ildə yaradılan və “Favipiravir” adı ilə tanınan bu preparat “İnfluenza” xəstəliyi ilə yanaşı, 2016-cı ildə Qərbi Afrkada tüğyan edən “Ebola” virusunun da müalicəsində istifadə olunub. Çin həkimlərinin kliniki sınaqları nəticəsində bu dərman preparatının həm də koronavirusa yoluxmuş yüngül və orta dərəcəli xəstələri heç bir əks təsirə məruz qoymadan 4 gün ərzində sağalda bildiyi ortaya çıxıb.

Dərman preparatının istehsalçısı “Fujifilm” markalı fotoaparatların istehsalçısı olan “Fujifilm Holdings”in törəmə qurumu olan “Fujifilm Toyoma Chemical” şirkətidir. Çinli mütəxəssislərin açıqlamasından dərhal sonra, “Fujifilm” səhmləri 15.43% bahalaşaraq 5238 yapon yenindən satılmağa başlayıb.

80 iştirakçı ilə Çinin Şenzen şəhərində keçirilən kliniki sınaqların müsbət nəticəsi koronavirusla mübarizədə böyük bir irəliləyiş kimi qələmə verilib.

© Materiallardan istifadə edərkən hiperlinklə istinad olunmalıdır