FED faiz dərəcəsini azaldıb.
BBN.az xəbər verir ki, ABŞ Mərkəzi Bankı (Federal Ehtiyat Sistemi – FED) əsas faiz dərəcəsini 0,25 faiz bəndi azaldaraq 3,75%–4,00% aralığında müəyyən edib. Əvvəlki göstərici isə 4,00%–4,25% səviyyəsində idi.
Bu qərar bazar gözləntilərinə uyğun olub – investorlar da FED-in növbəti addımının 0,25 faiz bəndi endirim olacağını proqnozlaşdırırdılar.
Bununla yanaşı, tənzimləyici qurum 1 dekabrdan etibarən balansın azaldılması prosesini dayandıracağını elan edib.
Beləliklə, FED-in siyasətçiləri əsas kredit dərəcəsini 25 baza bəndi azaltmaqla monetar yumşalma mərhələsini davam etdiriblər. Bu, sentyabr iclasında edilən endirimdən sonra növbəti addım kimi qiymətləndirilir. Qeyd edək ki, həmin qərar ötən ilin dekabrından bəri ilk faiz azaldılması idi.
Bu gecə Bakı vaxtı ilə saat 22:30-da FED sədri Cerom Pauel mətbuat konfransı keçirəcək və qərarın əsas arqumentlərini izah edəcək.
İqtisadi qeyri-müəyyənlik və yeni ton
FED-in qərarından sonra yayılan rəsmi bəyanatda qeyd olunub ki, Federal Açıq Bazar Komitəsi (FOMC) son dövrlərdə iqtisadi məlumatların məhdudluğu səbəbindən qiymətləndirmələrində daha ehtiyatlı mövqe tutub.
Bəyanatda deyilir: “Mövcud göstəricilər iqtisadi fəaliyyətin orta templə genişləndiyini göstərir. Məşğulluq artımı ilin əvvəlindən zəifləyib, işsizlik bir qədər yüksəlsə də, hələ də aşağı səviyyədə qalır. İnflyasiya isə ilin əvvəlindən artaraq yüksək səviyyədə sabitləşib.”
Kredit bazarlarına təsiri
FED-in bu qərarı ABŞ-da istehlakçı kreditlərinin faizlərinə birbaşa təsir göstərəcək. Xüsusilə dəyişkən faizli kredit kartları üçün faiz dərəcələrinin azalması gözlənilir. Əsas faiz (prime rate) göstəricisinin enməsi nəticəsində borcalanların xərcləri müəyyən qədər azala bilər.
Digər tərəfdən, ipoteka, avtomobil və tələbə kreditləri kimi uzunmüddətli borclar bu dəyişiklikdən daha yavaş təsirlənsə də, yeni kredit götürənlər üçün şərtlərin nisbətən yumşalması mümkündür.
