“Goldman Sachs”ın bir gün əvvəl dərc olunmuş analitik qeydinə görə, qlobal neft bazarında təklifin artması profisit yaradacaq və bu amil 2025-ci ildə neft qiymətlərinin enməsinə səbəb olacaq.
İnvestisiya bankı bununla yanaşı, Rusiya, Venesuela və İranla bağlı geosiyasi risklərin bazarda dəyişkənliyi artırmaqda davam edəcəyini qeyd edib.
“Goldman Sachs” 2026-cı il üçün Brent və WTI markalı neftin orta qiymət proqnozunu müvafiq olaraq 56 və 52 dollar səviyyəsində saxlayıb. Bank OECD ölkələrində ehtiyatların yığılması fonunda 2026-cı ilin son rübündə Brent və WTI qiymətlərinin minimum olaraq 54 və 50 dollara enəcəyini gözləyir.
Analitik qeyddə bildirilir ki, qlobal neft ehtiyatlarının artması və 2026-cı ildə sutkada 2,3 milyon barel profisit proqnozu ciddi tədarük pozuntuları və ya OPEC tərəfindən hasilatın azaldılması baş verməzsə, bazarın balansının bərpası üçün neft qiymətlərinin aşağı düşmə ehtimalını artırır. Bu vəziyyət OPEC-ə daxil olmayan ölkələrdə təklif artımını yavaşlatmalı və tələbin davamlı artımını dəstəkləməlidir.
Yanvarın 12-də günorta saatlarında Brent markalı neftin fyuçersləri barel üçün təxminən 62,9 dollar, ABŞ-nin West Texas Intermediate (WTI) markalı nefti isə 58,6 dollar səviyyəsində ticarət olunub. Qeyd edilib ki, ötən il hər iki etalon göstərici 2020-ci ildən bəri ən zəif illik nəticəni göstərərək təxminən 20 % ucuzlaşıb.
Bankın analitikləri ABŞ siyasətçilərinin dayanıqlı enerji təminatına və nisbətən aşağı neft qiymətlərinə fokuslanmasının aralıq seçkilər ərəfəsində qiymət artımını məhdudlaşdıracağını vurğulayıblar.
“Goldman Sachs”ın proqnozuna görə, 2027-ci ildə neft qiymətləri tədricən bərpa olunmağa başlayacaq və bazar yenidən defisitlə üzləşəcək. Buna səbəb OPEC-ə daxil olmayan ölkələrdə təklif artım tempinin zəifləməsi və tələbin davamlı şəkildə artması olacaq. Bank 2027-ci ildə Brent və WTI markalı neftin orta qiymətini 58 və 54 dollar səviyyəsində proqnozlaşdırır ki, bu da əvvəlki qiymətləndirmədən 5 dollar aşağıdır.
İnvestisiya bankı hesab edir ki, onilliyin sonuna doğru, uzunmüddətli investisiyaların bir neçə il aşağı səviyyədə qalmasından sonra, 2040-cı ilədək tələbin artması fonunda neft qiymətləri əhəmiyyətli dərəcədə bərpa oluna bilər. Bankın hesablamalarına əsasən, 2030–2035-ci illərdə Brent və WTI markalı neftin orta qiymətləri müvafiq olaraq 75 və 71 dollar təşkil edəcək ki, bu da əvvəlki proqnozdan 5 dollar aşağıdır.
“Goldman Sachs” qeyd edib ki, OPEC-ə daxil olmayan ölkələrdən təklifin daha da artması ehtimalı nəzərə alınmaqla neft qiymətləri üzrə risklər orta dərəcədə aşağı yönlü olaraq qalır. Bank analitikləri geosiyasi risklərə və spekulyativ mövqelərin aşağı səviyyəsinə baxmayaraq, OPEC tərəfindən hasilatın azaldılacağını gözləmədiklərini də vurğulayıblar.
