Bu il iyulun 1-nə Azərbaycan Dövlət Neft Fondunun (ARDNF) investisiyalarında Avropa ölkələrinin payı 27% təşkil edib.
BBN.az xəbər verir ki, bu göstərici ötən ilin eyni tarixi ilə müqayisədə 4,4 faiz bəndi azalıb.
Hesabat dövründə ARDNF-in investisiya portfelində Şimali Amerika ölkələrinin payı 2,2 faiz bəndi artaraq 27,5%-ə, Asiya ölkələrinin payı 0,8 faiz bəndi yüksələrək 9,9%-ə çatıb.
Yaxın Şərq ölkələrinin payı dəyişməyərək 1,4%, Avstraliya və Yeni Zelandiyanın payı 0,2 faiz bəndi artaraq 1,1%, Latın Amerikası ölkələrinin payı isə dəyişməyərək 0,1% təşkil edib.
ARDNF-in investisiyalarında beynəlxalq maliyyə təşkilatlarının payı 1,4 faiz bəndi azalaraq 1,6%-ə düşüb. Qızılın payı isə 2,6 faiz bəndi artaraq 31,4%-ə yüksəlib.
İyulun 1-nə ARDNF-in investisiya portfelinin ümumi dəyəri 72 milyard 595,1 milyon ABŞ dolları təşkil edib. Bu, ötən ilin eyni dövrü ilə müqayisədə 9,1% çoxdur.
Hesabat tarixinə Fondun aktivləri isə 72 milyard 596 milyon ABŞ dolları olub ki, bu da illik müqayisədə 9,1% artım deməkdir.
