Bakı intellektual texnologiyalar və ideyaların mərkəzinə çevrilib. Paytaxtda Beynəlxalq Universitetlərarası Proqramlaşdırma Müsabiqəsinin (ICPC) 49-cu dünya finalı keçirilir.
ICPC fondunun prezidenti Bill Pauçer Azərbaycan paytaxtını “Yer planetinin ən ağıllı şəhəri” adlandırıb.
O, jurnalistlərə açıqlamasında bildirib ki, ICPC artıq 49 ildir fəaliyyət göstərir:
“Biz həmişə istedadlı tələbələri məsələləri həll etmək bacarıqlarını inkişaf etdirməyə və öz cəmiyyətlərinə fayda gətirən sistemlər yaratmağa həvəsləndirmişik. Hazırda ICPC-nin dünya finalı Bakıda keçirilir. Bu səbəbdən, bütün bu parlaq tələbələr sayəsində, bu gün Bakı Yer planetinin ən ağıllı şəhəridir”, – B.Pauçer vurğulayıb.
Onun sözlərinə görə, ICPC-nin indiyədək təxminən 500 min məzunu olub.
“Onlar öz həmkarları ilə birlikdə bu gün etibar etdiyimiz kritik əhəmiyyətli sistemlərin, o cümlədən süni intellekt texnologiyalarının qurulmasında iştirak ediblər”, – ICPC prezidenti əlavə edib.
