Azərbaycan və Ermənistan arasında sülh sazişinin imzalanması daha geniş regional əməkdaşlıq və inteqrasiya üçün yeni imkanlar yarada bilər.
Bu barədə Beynəlxalq Valyuta Fondunun (IMF) Mərkəzi Asiya və Qafqaz (CCA) regionuna dair son hesabatında qeyd olunub.
Sənədə əsasən, region ölkələrində fiskal siyasət 2025-ci ildə ümumilikdə ekspansionist olacaq, lakin 2026-cı ildən etibarən məhdudlaşdırıcı kursa keçid gözlənilir.
IMF vurğulayır ki, bu dəyişikliklərə Azərbaycanda kapital xərclərinin azaldılması və Qazaxıstanda qeyri-neft gəlirlərinin artırılmasına yönəlmiş fiskal islahatlar təsir göstərəcək. Qırğızıstan və Tacikistan isə istisna təşkil edəcək – bu ölkələrdə fiskal siyasətin orta müddətli perspektivdə ekspansionist olaraq qalacağı, kapital xərclərinin artmasının əsas səbəb olacağı bildirilir.
Hesabatda həmçinin qeyd olunur ki, CCA regionunda orta müddətli iqtisadi artım templəri mövcud proqnozları üstələyə bilər. Bu artıma uzunmüddətli infrastruktur investisiyaları və Ukraynadakı münaqişənin nəticələri ilə bağlı son hadisələrin müsbət təsirlərinin daha davamlı olması səbəb ola bilər.
IMF ekspertlərinin qiymətləndirməsinə görə, bu amillər region ölkələrinin potensial ÜDM-ni baza səviyyəsindən yuxarı qaldıra bilər.
Proqnozlara əsasən, 2025-ci ildə CCA regionunda iqtisadi artım 5,6 %, 2026-cı ildə 4,7 %, 2030-cu ildə isə 4 % təşkil edəcək. Neft ixrac edən ölkələrdə ÜDM artım tempi 2025-ci ildə 4,9 %, 2026-cı ildə 4 %, 2030-cu ildə isə 3,1 % gözlənilir.
Neft idxal edən ölkələrdə isə iqtisadi artımın 2025-ci ildə 6,8 %, 2026-cı ildə 5,7 %, 2030-cu ildə isə 5,4 % olacağı proqnozlaşdırılır.
