Yaxın Şərqdə davam edən hərbi münaqişə qlobal korporativ sektor üçün ağır iqtisadi fəsadlar törətməyə başlayıb. Enerji daşıyıcılarının bahalaşması və tədarük zəncirinin qırılması dünyanın ən böyük şirkətlərinin mənfəət marjasını ciddi şəkildə təhdid edir.
BBN.az xəbər verir ki, Reuters agentliyinin ABŞ, Avropa və Asiya birjalarında listinqdə olan nəhəng şirkətlərin rəsmi hesabatları əsasında apardığı təhlil müharibənin qlobal biznesə ən azı 25 milyard dollar birbaşa zərər vurduğunu ortaya qoyub. İranın Hürmüz boğazındakı blokadası nəticəsində neft qiymətlərinin müharibədən əvvəlki dövrlə müqayisədə 50%-dən çox bahalaşaraq 100 dolları keçməsi bu maliyyə yükünü hər ötən gün daha da artırır. Analizlər göstərir ki, ən azı 279 qlobal şirkət itkiləri azaltmaq üçün istehsalı azaltmaq, qiymətləri qaldırmaq, dividendləri dayandırmaq və ya işçiləri məcburi məzuniyyətə göndərmək kimi müdafiə xarakterli addımlar atmağa məcbur olub.
Maliyyə zərbəsindən ən böyük payı aviasiya sektoru alıb; belə ki, aviayanacağın iki dəfəyə yaxın bahalaşması hava yolları şirkətlərinə 15 milyard dollara başa gəlib. Sənaye nəhənglərindən Yaponiyanın Toyota şirkəti münaqişə səbəbindən 4.3 milyard dollar, ABŞ-ın Procter & Gamble (P&G) korporasiyası isə xalis mənfəətdə 1 milyard dollar itki gözlədiyini bəyan edib. Whirlpool, McDonald’s və Continental kimi müxtəlif sektorların liderləri də artan xərclərin artıq istehlakçı inamını zəiflətdiyini və alıcıların yeni məhsul almaq əvəzinə köhnələri təmir etməyə üstünlük verdiyini vurğulayırlar.
Analitiklər qeyd edirlər ki, qlobal biznes mühiti COVID-19 pandemiyası və Rusiya-Ukrayna müharibəsindən sonra növbəti ən böyük böhran dalğası ilə üz-üzədir. Hərçənd ki, diplomatik kanallarda və atəşkəs danışıqlarında müəyyən addımlar atılır, Hürmüz boğazında logistikanın tam bərpa olunmaması neft-kimya, gübrə, alüminium və polietilen kimi xammalların qıtlığını dərinləşdirir. Bu isə o deməkdir ki, ilin ikinci yarısında qlobal inflyasiya təzyiqləri daha da kəskinləşə bilər.
