ABŞ-ın çip istehsalçısı Nvidia 2027-ci maliyyə ilinin ikinci rübü üzrə maliyyə nəticələrini açıqlayıb.
BBN.az xəbər verir ki, şirkətin iyulun 26-da başa çatan üç aylıq dövrdə gəliri illik müqayisədə 106 % artaraq 96,2 milyard dollar təşkil edib. Bu göstərici bazar gözləntilərini də üstələyib.
Müqayisə üçün qeyd edək ki, əvvəlki maliyyə ilinin eyni dövründə şirkətin gəliri 46,7 milyard dollar olub. Nvidia-nın gəliri əvvəlki rüblə müqayisədə isə 18 % artıb.
Şirkətin əsas gəlir mənbəyi olan məlumat mərkəzləri seqmenti üzrə gəlirlər illik müqayisədə 117 % artaraq 89 milyard dollara yüksəlib.
Nvidia cari rüb üçün gəlir proqnozunu 108 milyard dollar səviyyəsində açıqlayıb. Bu, analitiklərin 104,19 milyard dollarlıq gözləntisindən təxminən 2 % çoxdur.
Şirkətin xalis mənfəətində də əhəmiyyətli artım qeydə alınıb. Hesabat dövründə Nvidia-nın xalis mənfəəti illik müqayisədə 126 % artaraq 59,7 milyard dollar təşkil edib.
Bununla yanaşı, şirkət 2028-ci maliyyə ilinə qədər gəlirlərinin təxminən 70 % artacağını gözlədiyini bildirib. Nvidia-nın açıqlamasına əsasən, birbaşa müştərilərdən biri hesabat dövründə şirkətin ümumi gəlirlərinin 16 %-ni formalaşdırıb.
