PAŞA Sığorta korporativ sosial məsuliyyət siyasəti çərçivəsində Azərbaycan Qızıl Aypara Cəmiyyətinin Sumqayıt Regional Mərkəzi ilə əməkdaşlıq edərək “Mərhəmətli Olmağa Tələsin” xeyriyyə aksiyasında iştirak edib.
Artıq 16 ildir təşkil olunan aksiya ehtiyaclı uşaqlara dəstək göstərməyi hədəfləyir. Bu il aksiyada hər iki valideynini itirmiş uşaqlara, tək anaların övladlarına, sağlamlıq imkanları məhdud uşaqlara, həmçinin şəhid və qazi övladlarına qış geyimləri və digər vacib ləvazimatlar təqdim olunub.
Tədbirdə göstərdiyi dəstəyə görə PAŞA Sığorta Azərbaycan Qızıl Aypara Cəmiyyətinin Sumqayıt Regional Mərkəzi tərəfindən “Təşəkkürnamə” ilə təltif edilib.
Hazırda qeyri-həyat sığorta sektorunun lideri olan PAŞA Sığorta 2006-cı ildən fəaliyyət göstərir. “PAŞA Holding”in üzvü olan şirkət 700 mindən çox korporativ və fərdi müştəriyə 36 növ icbari və könüllü sığorta xidməti göstərir. “AM Best” beynəlxalq reytinq agentliyi şirkətin emitentin uzunmüddətli kredit reytinqini “BBB”, maliyyə dayanıqlılığı reytinqini isə “B++” səviyyəsində, proqnozunu isə “Sabit” olaraq təsdiqləyib.
