Financial Times yazır ki, beynəlxalq ödəniş sistemlərində ölkələrarası əməliyyatların sürətini və səmərəliliyini artırmaq məqsədilə iri həcmli texnoloji layihələr üzrə rəqabət güclənir. Hazırda qlobal krossover ödənişlərin böyük hissəsi SWIFT sistemi və ABŞ dolları vasitəsilə həyata keçirilir ki, bu da Qərb ölkələrinə mühüm geosiyasi üstünlük qazandırır. Lakin mövcud müxbir bank şəbəkəsi çoxpilləli əməliyyat zənciri, valyuta çevrilmələri və AML/KYC yoxlamaları səbəbindən yavaşdır və bahalıdır.
BBN.az xəbər verir ki,nəşrin məlumatına görə, bu sahədə iki əsas layihə ön plana çıxır. Çin, Tayland, Honkonq, Birləşmiş Ərəb Əmirlikləri və Səudiyyə Ərəbistanı mərkəzi banklarının birgə təşəbbüsü olan mBridge blokçeyn və mərkəzi bank rəqəmsal valyutaları əsasında SWIFT-dən yan keçərək real vaxtlı ödənişləri təmin etməyi hədəfləyir. Layihə 2022-ci ildən real əməliyyat sınaqlarına başlayıb. Digər mühüm təşəbbüs isə ABŞ Federal Ehtiyat Bankı, Fransa Bankı, Yaponiya Bankı, İngiltərə Bankı və 43 maliyyə institutunun iştirak etdiyi Project Agorá-dır. Bu platforma mövcud sistemi tamamilə əvəzləmək deyil, tokenləşdirilmiş pullar və vahid rəqəmsal qeydiyyat texnologiyası vasitəsilə yeniləmək məqsədi daşıyır.
FT qeyd edir ki, Vaşinqton Agorá layihəsini dəstəkləyərək dolların beynəlxalq mövqeyini möhkəmləndirmək və Çin rəhbərliyindəki alternativ ödəniş sistemlərinin təsirini məhdudlaşdırmaq istəyir. Analitiklərin fikrincə, hər iki layihə hazırda sınaq mərhələsində olsa da, gələcəkdə qlobal krossover ödənişlərin texniki və geosiyasi arxitekturasını köklü şəkildə dəyişdirə bilər.
