Neft qiymətləri həftənin ilk ticarət günündə son iki həftənin ən yüksək səviyyəsində qərarlaşıb.
BBN.az xəbər vrir ki, investorların ABŞ Federal Reserve-in bu həftə faiz endirimina gedəcəyini gözləməsi enerji tələbinin artacağına dair ümidləri gücləndirir. Bununla yanaşı, Rusiya və Venesuela təchizatına dair geosiyasi risklər də bazarda qiymətləri dəstəkləyən əsas amillər arasındadır.
Asiya sessiyasında Brent markalı neftin qiyməti 63.84 dollar səviyyəsinə qalxaraq gün ərzində 0.14% artım göstərib. WTI (West Texas Intermediate) markalı ABŞ nefti isə 60.16 dollar civarında ticarət olunaraq 0.13% yüksəlib.
Neft bazarındakı müsbət dinamikanı gücləndirən əsas faktor Fed gözləntisidir. LSEG-in bazar məlumatlarına görə, investorlar arasında faizlərin 0.25 bənd endirilməsi ehtimalı 84%-ə çatıb. Analitiklər qeyd edirlər ki, belə qərar ABŞ iqtisadi aktivliyini artıraraq enerji tələbinə müsbət təsir göstərə bilər.
Digər tərəfdən, geosiyasi fon yenə də diqqət mərkəzindədir. G7 və Avropa İttifaqının Rusiya neftinin daşınması ilə bağlı yeni məhdudiyyətlər tətbiq etməyi müzakirə etdikləri bildirilir. Rusiya və ABŞ arasında Ukrayna üzrə mövqelərin fərqli olması da regiondakı qeyri-müəyyənliyi artırır. Bu risklər neft təchizatında mümkün azalmanın qiymətlərə dəstək verməyə davam edəcəyini göstərir.
Ekspertlər hesab edirlər ki, həm geosiyasi təzyiqlər, həm də Fed-in qərarı bu həftə neft bazarının istiqamətini müəyyən edən əsas amillər olacaq.
