Qlobal enerji bazarlarında neft qiymətləri, Yaxın Şərqdən gələn tədarük risklərinin azalması fonunda ucuzlaşma tendensiyası nümayiş etdirir.
ABŞ və İran arasında davam edən diplomatik danışıqların müsbət istiqamətdə irəliləməsi, bölgədən xam neft ixracı ilə bağlı yaranan qorxuları neytrallaşdırır. Hömüz boğazından keçən neft daşımalarının gündəlik 10 milyon bareli aşması və bazara davamlı tədarük axınının bərpa olunması investorların geopolitik risklərə qarşı narahatlığını xeyli azaldıb.
Bununla yanaşı, ABŞ Enerji İnformasiya İdarəsinin (EIA) son hesabatı ölkə daxilində xam neft hasilatının aprel ayında gündəlik 13.93 milyon barel ilə tarixi rekord həddə çatdığını təsdiqləyib. Qlobal miqyasda tədarük bolluğu ilə bağlı gözləntilərin artması qiymətlərə aşağı yönlü təzyiq göstərməkdədir. Hər nə qədər boğazın gələcək idarəetməsi ilə bağlı qeyri-müəyyənliklər qiymətləri müəyyən dərəcədə dəstəkləsə də, hazırda bazar iştirakçıları ABŞ-İran danışıqlarından gələcək xəbərləri və yeni inventar məlumatlarını yaxından izləyirlər.
