Bu ilin yanvar-iyun aylarında Azərbaycanda dövlət əmlakının özəlləşdirilməsindən dövlət büdcəsinə 131 milyon manat vəsait daxil olub.
BBN.az xəbər verir ki, bu barədə Əmlak Məsələləri Dövlət Xidmətindən məlumat verilib. Bu göstərici ötən ilin eyni dövrü ilə müqayisədə 64,8% çoxdur.
Hesabat dövründə Dövlət Xidməti tərəfindən 32 hərrac keçirilib. Hərraclar nəticəsində 3 səhmdar cəmiyyətinin səhm paketi, 2 kiçik dövlət müəssisəsi, 1 yarımçıq tikili sahəsi və 520 nəqliyyat vasitəsi özəlləşdirilib.
Bundan başqa, yanvar-iyun aylarında 282-si qeyri-yaşayış sahələri, 2 084-ü isə torpaq sahələri üzrə olmaqla, ümumilikdə 2 366 yeni icarə müqaviləsi bağlanıb. Bu, illik müqayisədə 24,5% çoxdur.
Nəticədə dövlət əmlakının, o cümlədən qeyri-yaşayış və torpaq sahələrinin icarəsindən dövlət büdcəsinə 28,2 milyon manat vəsait ödənilib. Bu göstərici ötən ilin eyni dövrü ilə müqayisədə 29,4% çoxdur.
Beləliklə, ilin ilk 6 ayında özəlləşdirmə və icarədən dövlət büdcəsinə ümumilikdə 159,2 milyon manat vəsait daxil olub. Bu isə illik müqayisədə 57,2% artım deməkdir.
