Azərbaycan Banklar Assosiasiyasının aparıcı iqtisadçısı Vüsal Həsənov 2025-ci ilin I yarımilində bank sektorunda dayanıqlı maliyyələşdirmə üzrə ilkin nəticələri açıqlayıb.
Vüsal Həsənov bildirib ki, banklar tərəfindən ümumilikdə 12 756 ədəd yaşıl kredit verilib və bu kreditlərin ümumi həcmi 289,9 milyon manat təşkil edib. Ən böyük pay dayanıqlı kənd təsərrüfatı, heyvandarlıq və akvakultura sahəsinə düşür; burada 12 285 kredit verilməklə ümumilikdə 91,05 milyon manat maliyyələşmə həyata keçirilib.
“Banklar tərəfindən verilən yaşıl kreditlərin həcmi tədricən artır və bu, sektorun dayanıqlı inkişaf gündəliyinə verdiyi əhəmiyyətin göstəricisidir,” — deyə Vüsal Həsənov qeyd edib. “Növbəti mərhələdə yaşıl kreditlərin payının artırılması üçün maliyyələşmə mexanizmlərinin sadələşdirilməsi, risk dəstəyinin gücləndirilməsi və beynəlxalq təcrübənin tətbiqi xüsusi önəm daşıyır.”
Digər sahələr üzrə göstəricilər aşağıdakı kimidir:
- Yaşıl nəqliyyat: 112,13 milyon manat (284 kredit)
- Enerji səmərəliliyi: 37,51 milyon manat (89 kredit)
- Bərpaolunan enerji: 18,64 milyon manat (5 kredit)
- Su resurslarının dayanıqlı idarə olunması: 14,60 milyon manat (31 kredit)
- Çirklənmənin qarşısının alınması: 1,25 milyon manat (4 kredit)
- Dairəvi iqtisadiyyat və tullantıların idarə olunması: 14,70 milyon manat (58 kredit)
Vüsal Həsənov vurğulayıb ki, bu ilkin nəticələr bank sektorunun yaşıl maliyyə fəaliyyətinin başlanğıc mərhələsini əks etdirir.
Müsahibədə həmçinin qeyd olunub ki, COP29 tədbiri çərçivəsində bank sektoru tərəfindən bəyan edilmiş 2 milyard manat həcmində dayanıqlı layihələrin maliyyələşdirilməsinə dair öhdəliyin icrasının monitorinqi məqsədilə hazırlanan hesabat artıq ABA-nın rəsmi saytında dərc olunub. 2025-ci ilin ilk yarısınadək bu öhdəliyin təxminən 15,4%-i, yəni 308,15 milyon manatlıq maliyyələşdirmə artıq həyata keçirilib.
