Azərbaycanın və Cənubi Qafqazın ən böyük bankı ABB tərəfdaşlıq və Özbəkistanın “Davr Bank”ında pay əldə etməklə bu ölkənin bank bazarına daxil olur.
BBN.az xəbər verir ki, bunu Azərbaycanın iqtisadiyyat naziri Mikayıl Cabbarov Daşkənddə keçirilən Özbəkistan-Azərbaycan IV Regionlararası Forumunda çıxışı zamanı bildirib.
Nazirin sözlərinə görə, hazırda Özbəkistanda Azərbaycanın demək olar ki, bütün iri vergi ödəyicisi şirkətləri təmsil olunur.
“Bu gün Azərbaycanın və bütün Cənubi Qafqaz regionunun ən böyük bankı – ABB ilə müqavilə imzalanacaq ki, bu da bankın tərəfdaşlıq və “Davr Bank”da pay əldə etmə yolu ilə Özbəkistan bazarına çıxmasını göstərir”, – deyə Mikayıl Cabbarov qeyd edib.
İqtisadiyyat naziri layihənin həyata keçirilməsinə yaradılan investisiya mühitinə və göstərilən dəstəyə görə Özbəkistan Prezidenti Şavkat Mirziyoyevə, ölkənin Mərkəzi Bankına, tənzimləyici orqanlarına və hökumətinə təşəkkür edib.
Cabbarov qarşıdakı sazişin maliyyə şərtləri və ABB-nin “Davr Bank”da əldə edəcəyi payın həcmi ilə bağlı təfərrüatları açıqlamayıb.
Qeyd edək ki, Özbəkistan-Azərbaycan IV Regionlararası Forumu iki ölkə arasında iqtisadi əməkdaşlığın genişləndirilməsi, birgə investisiya və ticarət layihələrinin həyata keçirilməsi, həmçinin regionlar arasında birbaşa əlaqələrin inkişafına həsr olunub.
ABB-nin “Davr Bank”da pay əldə etməsi Azərbaycanın aparıcı bankının xarici bazarlardakı fəaliyyətinin genişləndirilməsi baxımından mühüm addım hesab oluna bilər.
