Dolların “taxtı” sarsılır: Sülh xəbərləri yaşıl valyutanı dibə çəkir!
Qlobal valyuta bazarlarında ABŞ dolları digər əsas valyutalar qarşısında son altı həftənin ən aşağı səviyyələrində qərarlaşıb. İnvestorların ABŞ və İran arasında mümkün sülh sazişinə olan ümidləri dolların “təhlükəsiz liman” statusuna tələbi azaldıb.
Valyuta bazarlarında son durum:
Dollar İndeksi (DXY): 98.02 bənd səviyyəsinə qədər geriləyərək son 8 sessiyada ən zəif göstəricisini nümayiş etdirib.
Avro/Dollar: Avro dollar qarşısında möhkəmlənərək 1.1808 səviyyəsinə yüksəlib (Fevral ayından bəri ən yüksək hədd).
Funt Sterlinq: Britaniya valyutası da artım trendini davam etdirərək 1.3569 dollara çatıb.
Vaşinqton və Tehran arasında Pakistanın vasitəçiliyi ilə keçirilən danışıqların müsbət nəticələnəcəyi gözləntisi risk iştahını artırıb. Bu isə investorların vəsaitlərini dollardan çıxararaq daha riskli aktivlərə (səhmlərə və inkişaf etməkdə olan ölkələrin valyutalarına) yönəltməsinə səbəb olub. İnflyasiya göstəriciləri də bu məsələdə az rol oynamır. Belə ki, ABŞ-da istehsalçı qiymətlərinin (PPI) gözləniləndən aşağı olması da dolların güclənməsinin qarşısını alan amillərdən biridir. Analitiklər hesab edir ki, əgər Yaxın Şərqdə gərginlik diplomatik yolla həll olunarsa, dollar indeksi 98 bəndlik dəstək səviyyəsindən aşağı düşərək eniş trendini daha da sürətləndirə bilər.
