Son 20 ildə Azərbaycanın strateji valyuta ehtiyatları 38 dəfədən çox artaraq 37 aylıq mal və xidmət idxalını maliyyələşdirmək imkanını təmin edib.
Bunu Azərbaycan Mərkəzi Bankı (AMB) sədrinin müavini Əli Əhmədov Milli Məclisin İqtisadi siyasət, sənaye və sahibkarlıq komitəsinin elmi-praktik konfransında bildirib.
Onun sözlərinə görə, AMB-nin hökumətlə birgə həyata keçirdiyi siyasət nəticəsində son 20 ildə ölkədə makroiqtisadi sabitlik təmin olunub, orta illik inflyasiya birrəqəmli səviyyədə — təxminən 6 % ətrafında saxlanılıb.
Əli Əhmədov qeyd edib ki, son illər AMB-nin həyata keçirdiyi pul siyasəti makroiqtisadi sabitliklə dayanıqlı iqtisadi artım arasında optimal balansın qorunmasına xidmət edib: “Bu, yalnız sabitliyin göstəricisi deyil, həm də gələcək nəsillərin iqtisadi təhlükəsizliyi üçün möhkəm təminatdır”.
AMB rəsmisi əlavə edib ki, maliyyə sabitliyi siyasətinin əsas prioritetləri bank sektoruna etimadın qorunması, idarəetmə potensialının artırılması və şoklara qarşı dayanıqlığın gücləndirilməsidir.
