“Azər-Türk Bank” ASC-nin səhmdarlarının avqustun 25-də keçirilməsi planlaşdırılan növbəti ümumi yığıncağının vaxtı dəyişdirilib.
Saat 12:00-da keçirilməsi nəzərdə tutulan yığıncaq sentyabrın 28-nə təyin edilib.
Yığıncaq bankın baş ofisinin yerləşdiyi Bakı şəhəri, Nəsimi rayonu, Cəlil Məmmədquluzadə küçəsi, 85 ünvanında keçiriləcək.
Yığıncağın gündəliyinə “Azər-Türk Bank”ın Müşahidə Şurasının tərkibində dəyişiklik edilməsi məsələsi daxildir.
Qeyd edək ki, “Azər-Türk Bank” ASC 1995-ci ildə yaradılıb. Bankın nizamnamə kapitalı 100,5 milyon manatdır.
Bankın səhmlərinin 51 %-i Dövlət Neft Şirkətinə (SOCAR), 24 %-i Azərbaycan hökuməti adından çıxış edən İqtisadiyyat Nazirliyi yanında Əmlak Məsələləri Dövlət Xidmətinə, 12,37 %-i Türkiyənin “Zıraat Bank”ına, 1,08 %-i “Zıraat Bank İnternational”a, 6,55 %-i “AzRe Təkrarsığorta” ASC-yə, 5 %-i isə “Qala Həyat Sığorta” ASC-yə məxsusdur.
