Azərbaycanda ötən il bank sektoru tərəfindən yaşıl və dayanıqlılıqla əlaqəli layihələrə ümumilikdə 371 milyon manat maliyyə ayrılıb.
Bu barədə Azərbaycan Mərkəzi Bankı-nın “Dayanıqlı Maliyyə Hesabatı”nda qeyd olunub.
Hesabatda bildirilib ki, COP29 çərçivəsində Azərbaycanın bank sektoru 2030-cu ilə qədər dayanıqlı və yaşıl layihələrə 2 milyard manat vəsait ayırmağı planlaşdırır.
Qeyd olunub ki, bunun nəticəsi olaraq 2025-ci ildə yaşıl layihələrə 344 milyon manat, dayanıqlılıqla əlaqəli layihələrə isə 27 milyon manat maliyyə yönəldilib.
Məlumata əsasən, ayrılmış kreditlərin böyük hissəsi yaşıl nəqliyyat və dayanıqlı kənd təsərrüfatı sahələrinin payına düşüb. Bununla yanaşı, enerji səmərəliliyi və su resurslarının dayanıqlı idarə olunması istiqamətlərində də maliyyələşmə həyata keçirilib.
