2025-ci ildə Böyük Britaniya müttəfiq ölkələrlə müdafiə texnikasının satışı üzrə ümumilikdə 20 milyard funt-sterlinq (təxminən 27 milyard ABŞ dolları) məbləğində sazişlər bağlayıb ki, bu da son 40 il ərzində rekord göstərici hesab olunur.
bbn.az xəbər verir ki, bu barədə Britaniya hökumətinin mətbuat xidməti məlumat yayıb.
Məlumata görə, bağlanan sazişlər sırasında Böyük Britaniyanın hərbi gəmilərinin ixracı üzrə tarixdə ən böyük müqavilə, eləcə də son bir nəsil ərzində ən iri qırıcı təyyarə satışı yer alır. Belə ki, Böyük Britaniya Norveç Hərbi Dəniz Qüvvələrinə ən azı beş ədəd 26 tipli fregatın tədarükü üçün 10 milyard funt-sterlinq (təqribən 13,5 milyard dollar) dəyərində saziş imzalayıb.
Bundan əlavə, ölkə Türkiyəyə ümumi dəyəri 8 milyard funt-sterlinq (təxminən 10,8 milyard dollar) olan 20 ədəd Eurofighter Typhoon qırıcı təyyarəsinin, həmçinin 550 milyon funt-sterlinq dəyərində 12 ədəd C-130 təyyarəsinin tədarükünü həyata keçirəcək. Çexiya isə artıq 18 ədəd Supacat zirehli maşını alıb.
Britaniya hökuməti vurğulayıb ki, bu sazişlər nəticəsində 25 mindən çox yeni iş yeri yaradılıb. Qeyd edilib ki, bu proses Müdafiə Nazirliyinin son 50 il ərzində həyata keçirdiyi ən genişmiqyaslı islahatlar proqramı çərçivəsində, o cümlədən Milli Silahlanma Direktorları Qrupunun və onun beynəlxalq əməkdaşlıq və ixrac üzrə yeni komandasının yaradılması fonunda baş verir.
