Çin hökuməti ABŞ məhsullarına tətbiq edilən 24 faiz dərəcəsindəki əlavə gömrük rüsumunun bir il müddətinə dayandırıldığını açıqlayıb. Lakin 10 faiz səviyyəsindəki əsas rüsum qüvvədə qalacaq. Qərar Çin Dövlət Şurasının Tarif Komissiyası tərəfindən Prezident Si Cinpin və ABŞ Prezidenti Donald Tramp arasında ötən həftə Busanda keçirilən APEC sammitində baş tutan görüşdən sonra elan edilib.
BBN.az xəbər verir ki, komissiyanın açıqlamasına görə, bu addım iki ölkə arasında ticarət münasibətlərinin sabitləşdirilməsi və bazarların gərginlikdən qorunması məqsədi daşıyır. Eyni zamanda, Çin bəzi ABŞ kənd təsərrüfatı məhsullarına – xüsusilə soya, qarğıdalı və mal ətinə – tətbiq etdiyi 15 faizədək rüsumları 10 noyabrdan etibarən ləğv edəcək.
Arxa plan
Xatırladaq ki, Çin və ABŞ arasında ticarət gərginliyi 2018-ci ildə Tramp administrasiyasının Çin mallarına yüksək tariflər tətbiq etməsi ilə başlamışdı. Buna cavab olaraq, Pekin də ABŞ məhsullarına 10%-dən 25%-ə qədər dəyişən rüsumlar tətbiq etmişdi. 2020-ci ildə imzalanan “Birinci mərhələ ticarət razılaşması”ndan sonra bir sıra tariflər azaldılsa da, münasibətlərdə gərginlik qalmaqda idi.
2025-ci ilin əvvəlində Vaşinqtonun bəzi yüksək texnologiyalı avadanlıqlara ixrac məhdudiyyətləri tətbiq etməsi və Çin məhsullarına yeni 24%-lik əlavə rüsum gətirməsi ilə vəziyyət yenidən kəskinləşmişdi. Çin də cavab olaraq ABŞ mallarına eyni həcmdə rüsum tətbiq etmişdi.
Hazırda rüsumun dayandırılması iki ölkə arasında iqtisadi dialoqun bərpası istiqamətində müsbət addım kimi qiymətləndirilir. Analitiklər hesab edirlər ki, bu qərar həm Çin, həm də ABŞ bazarlarında qiymət sabitliyinə müsbət təsir göstərə bilər, xüsusilə də kənd təsərrüfatı və istehsal sektorlarında.
