Hesablama Palatası Azərbaycan Respublikası Dövlət Neft Fonduna (ARDNF) ölkənin payına düşən karbohidrogenlərin hasilatı və daxilolmaları üzrə proqnozlaşdırma mexanizmlərinin təkmilləşdirilməsini tövsiyə edib.
BBN.az “Report”a istinadən xəbər verir ki, bu barədə Hesablama Palatasının Fondun vəsaitlərinin formalaşdırılması və əsas istiqamətlər üzrə istifadəsinin audit nəticələrinə dair hesabatında bildirilib.
Hesabata əsasən, 2025-ci ildə Azərbaycanın payına düşən karbohidrogenlərin satışından ARDNF-yə 9 milyard 497 milyon manat vəsait daxil olub. Bu göstərici təsdiq edilmiş proqnozla müqayisədə 300,2 milyon manat və ya 3,1% az olub.
Hesablama Palatası karbohidrogenlərin hasilatı və daxilolmaları üzrə proqnozlarla faktiki icra göstəriciləri arasında müşahidə olunan fərqləri nəzərə alaraq, proqnozlaşdırma mexanizmlərinin təkmilləşdirilməsini zəruri hesab edib.
Bununla yanaşı, satış qiymətləri ilə bağlı risklərin effektiv idarə olunması, podratçılarla nəzarət mexanizmlərinin gücləndirilməsi və aidiyyəti təşkilatlar arasında koordinasiyanın artırılması istiqamətində müvafiq tədbirlərin görülməsi tövsiyə olunub.
