Şuşa Qlobal Media Forumu çərçivəsində “TikTok” və “LinkedIn” nümayəndələri ilə Azərbaycan arasında əməkdaşlıq perspektivləri müzakirə edilib.
BBN.az xəbər verir ki, bu barədə Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev “X” sosial şəbəkəsində paylaşım edib.
Görüşdə “TikTok”un Şərqi Avropa üzrə Hökumətlə Əlaqələr və İctimai Siyasət Departamentinin rəhbəri Diana Ryan, “LinkedIn”in Avropa, Yaxın Şərq, Afrika və Latın Amerikası regionları üzrə Dövlət Sektoru və Qeyri-Kommersiya Təşkilatları ilə Satış Departamentinin rəhbəri Seamus Clancy, həmçinin Dharana Digital şirkətinin direktoru, süni intellekt və sosial media üzrə tədqiqatçı Karen Sutherland iştirak ediblər.
Müzakirələr zamanı Azərbaycanla əməkdaşlığın genişləndirilməsi, rəqəmsal idarəetmə məsələləri və uşaqların onlayn mühitdə daha yaxşı qorunmasına yönəlmiş yeni qanunvericilik təşəbbüsləri diqqət mərkəzində olub.
Tərəflər, həmçinin rəqəmsal təhlükəsizlik və uşaqların internetdə qorunması sahəsində beynəlxalq qabaqcıl təcrübələr ətrafında fikir mübadiləsi aparıblar.
