Tramp üçüncü dəfə “TikTok”un satışını təxirə salıb

0

ABŞ Prezidenti Donald Tramp “TikTok”un ABŞ-dakı aktivlərinin satışına dair müddəti üçüncü dəfə təxirə salıb. Ağ Evdən verilən məlumata görə, tətbiqin ABŞ-dakı fəaliyyətini davam etdirməsi üçün daha əvvəl müəyyən edilmiş 19 iyun tarixindən etibarən əlavə 90 günlük möhlət tanınıb.

BBN.az xəbər verir ki, bu qərar ABŞ administrasiyasına həm istifadəçi məlumatlarının təhlükəsizliyini təmin etmək, həm də tarif razılaşmasını tamamlamaq üçün əlavə vaxt qazandıracaq.

Xatırladaq ki, Prezident Tramp Konqres tərəfindən “TikTok” üçün qəbul edilmiş və yanvar ayında qüvvəyə minməsi gözlənilən qadağanın icrasını bundan əvvəl iki dəfə təxirə salmışdı.

Ağ Evin mətbuat katibi Karolin Livit məsələyə münasibət bildirərək deyib: “Prezident Tramp bu həftə ‘TikTok’un fəaliyyətini davam etdirməsi üçün əlavə fərman imzalayacaq.”

Qəbul edilən bu qərar ABŞ və Çin arasında gərginlik yaradan “TikTok” məsələsində yeni çıxış yolu yaratmaqla yanaşı, həm amerikalı alıcının, həm də Pekin hökumətinin razılığını tələb edən mürəkkəb bir razılaşmanın əldə olunması üçün Trampa əlavə vaxt verir.